رحلة طبيب نحو MRCS

ده اللى كتبته اليوم اللى رجعت فيه من الامتحان :

النهارده 10 سبتمبر كان يوم موعود
امتحنت فيه الجزء الاول من امتحان زمالة الجراحة
للكلية الملكية البريطانية للجراحين

امتحنت فى الاكاديمية العسكرية الطبية فى
منشية البكرى عند كوبرى القبة

المهم.. انا اساسا رايح وانا قلقان جدا
لانى ماكانش معايا حد اعرفه من جامعة المنصورة
داخل الامتحان معايا.. واول مرة اروح اساسا منطقة منشية
البكرى .. ده انا مشيت مشى

فوجئت هناك لقيت تقريبا ان 95% من المتقدمين للامتحان
شباب صغير .. ولاحظت فى كلامهم عن النوبتجيات وكده
ان منهم كتير نواب فى الجامعة.... كنت متخيل انى هألاقى دكاترة
كتير كبار فى السن .. مثلا فوق الثلاثين

ولاحظت كمان انهم جروبات .. يعنى مجموعات من الشباب عارفين
بعض حتى انى اتحسرت على نفسى لانى ماكانش معايا ولاواحد صاحبى
يشجعنى على دخول الامتحان...

لاحظت كمان ان معانا دكتور داخل الامتحان وكبير فى السن ..شعره ابيض
اعتقد يكون اصغر من والدى بكم سنة ... كمان لقيت كم طبيب كده عمرهم
تقريبا فوق التلاتين بس كانوا قليلين .. يتعدوا ع الصوابع

كمان لقيت كم بنت.. حوالى 5 مثلا .. فوجئت حقيقة ان فيه بنات مهتمة
بزمالة الجراحة .. يعنى فى بالى ان الاطفال او الباطنة افضل لهم

المهم فضلت قاعد لوحدى فى الاستراحة بأراجع شوية ... واتخنقت شوية
من الشباب وهمّــا بيسلموا على بعض ويعلّــوا صوتهم فى الكلام وكأننا قاعدين
فى شارع....

طبعا مش لازم أوصف الاكاديمية من جوه نضيفة إزاى .. مستوى عالى طبعا..
المهم دخلنا قاعة الامتحان الساعة 11 قبل الظهر .. وقعدنا على الديسكات
وكان المراقبين علينا من المركز الثقافى البريطانى ناس محترمة وكويسة
وكانوا بيقولوا لنا التعليمات طبعا بالإنجليزى كلها ... وكل ديسك عليه قلم رصاص
وأستيكة لسه جديدة ... وبعدين وزعوا الاول ورقة الاجابة
وبعدين ورقة الاسئلة وغير مسموح لك تفتح ورقة الاسئلة إلا لما يقولوا لك ابدا
ولازم تقرا التعليمات اللى على ورقة الاسئلة كويس...

على فكرة ورقة الاسئلة شكلها مخيــــــف ...
تحس انها كشكول اسئلة لانها كانت 160 سؤال ومكتوبين بخط كبير وواضح

على فكرة ورقة الاجاية بتتصحح بالكمبيوتر ... يعنى مثلا السؤال رقم 1 لو
إجابته الصحيحه هى C انت بتظلل بالقلم الرصاص الخانة فى ورقة الاجابة
اللى تحت الرمز C ... وهكذا ... طبعا ماينفعش تعمل اجابتين والا مش هتاخد
درجة ولو عملت اجابة غلط مش هيتخصم منك درجة زى نظام بعض الامتحانات
التانية... ولو عايز تعدل اجباتك لازم تمسح التظليل كويس جدا بالاستيكة
وتظلل الرمز اللى انت شايفه اصح ...

طبعا القاعة والمراقبين كانوا منظمين جدا .. والوضع كان كويس والحمد لله

المهم ... المصيبة الكبرى .... الوقت ضيــــــــــــق جدااااااااا
مش ممكن ..... الامتحان 3 ساعات يعنى 180 دقيقة
140 إختيارى Single Best Answer
+ صح وغلط 20 واحدة True or Fals
ملحوظة : انا اخر امتحان هيكون فيه اسئلة صح وغلط
وإن شاء الله الامتحانات اللاحقة هيكون فيها 180 Single BA
يعنى كل واحدة صح وغلط بيشيلوها بيحطوا مكانها 2 SBA

المهم .. كل SBA لك فيها دقيقة واحدة فقط تقرا السؤال وتفكر
فى الاجابة وتتاكد منها فى دماغك وتظلل الخانة فى ورقة الاجابة

خلى بالكم ان فيه اسئلة كتير طويلة .. يعنى مثلا يقولك حالة عملت
عملية كذا وبعد العملية بكم يوم حصل له كذا وعملنا له فحوصات لقينا
كذا وكذا وكذا وكذا .. واربط بقى ياباشا الطلاسم ببعضها فى دقيقة واحدة

هتلاقى نفسك بعد ساعة مثلا من الامتحان بتجرى فى الاسئلة عشان
تلحق تخلص... انا كنت بفكر لفترة بسيطة اوى ... وبعدين اقرر الاجابة الاقرب
للصواب فى دماغى... حتى انى لما الاقى نفسى محتار بين اجاتين من ضمن
الاربع اختيارات ... لازم اقرر بسرعة عشان الحق السباق...

والله انا كنت حاسس انى بجرى ... وياااااااادوب لحقت اخلص قبل ماتقول سيب
القلم تقريبا بدقيقة واحدة...

المشكلة انى حسيت ان الوقت ضيق جدا... والاسئلة اللى كنت حاسس انى
قابلتها فى حل الاسئلة وعدت عليا يمكن مثلا 40-50 % من الامتحان فقط
وبعدين مثلا 30 % من الامتحان ماعدوش عليا بنفس الاسلوب بس حليت
على حسب المعلومات اللى اكتسبتها من مذاكرتى
وبعدين حوالى 20 % من الاسئلة كانت صعبة عليا
ومشكلتى انى ماكانش عندى وقت كفاية افكر وأراجع المعلومات فى دماغى

انا حاليا بصراحة قلقان من نتيجة الامتحان وعارف انى مش هاجيب درجة عالية
فيه.. ودلوقتى بفكر ياترى مطلوب منى اجيب كم فى المية فى النتيجة
عشان اعدى الامتحان ..انا بعت لهم إيميل قبل الامتحان اسألهم
عن النسبة المطلوبة للنجاح بس قالولى انه مش حددة لسا
المهم ان النتيجة ان شاء الله مش قبل
3 اكتوبر الجاى ان شاء الله وهتكون من الموقع عن طريق رقم ال ID اللى
استملته منهم ..
ادعوا لى انى اجتاز الامتحان ان شاء الله بنتيجة كويسة...
وانصح اللى بيفكر يدخل امتحان الزمالة انه لازم يراجع مرتين على الاقل
لانى راجعت مرة واحدة بس ... وكمان لازم يكون مستعد للسرعة فى استيعاب
السؤال وحله ...
كمان لما يقابلك معلومات وانت بتذاكر .. زى مثلا
ال Risk factors وال Incidence with certain age وال
Common incidence of specific disorder or disease after
certain trauma or surgical operations
لازم تاخد بالك منها كويس جدا جداااا
مثال : Papillary Thyroid Carcinoma common in females
risk factors for Cancer breast,e.g. late menopause & early menarche
طبعا لازم تذاكروا كويس جدا الاعصاب والاوعية الدموية
فى Upper & Lower Limbs
كذلك العضلات ... وخاصة علاقة ال Muscle Tendons مع
عظام ال hand & foot
كذلك علاقة الاعصاب والاوعية الدموية ببعضها
مثال : Median Artery cross brachial artery
from lateral to become medial to it

كل الامثلة اللى قلتها لكم دى .. جت لى النهارده فى الاسئلة

يارب اكون افدتكم وانا مش بقول كده عشان احبط اللى عايز يخش الامتحان
ولكن لازم تستعدوا كويس ليه ... مع تمنياتى بالتوفيق لكم جميعا

يتبع .. ده الرد اللى كتبته يوم نجاحى :

السلام عليكم ورحمة الله وبركاته

الحمد لله رب العالمين ::: نجـــــــحـــــــــــت

المفروض مكتوب لى فى الورقة اللى فيها رقمى

Candidate number

ان النتيجة مش قبل 3 اكتوبر 2007

Not before 3rd of October 2007

يعنى معناها انى انتظرها من بعد يوم 3 اكتوبر إلى ماشاء الله

المهم : يوم 3 اكتوبر دخلت موقع المركز الثقافى البريطانى لان

المفروض اننا هنشوف النتيجة من على النت وممنوع نتصل بيهم

فى المركز الثقافى البريطانى نسالهم عن نتيجتنا ..

مالقيتش النتيجة .... قلت اصبر لبكره ... دخلت تانى يوم

برضه مش لاقى النتيجة ... اتصلت بيهم عشان اعرف النتيجة هتظهر

امتى ... ردت عليا واحدة وقالت لى ان النتيجة ظهرت فعلا

بس طلعت انا غلطان .. لان النتيجة كانت فى موقع الكلية الملكية

www.rcseng.ac.uk

وليس المركز الثقافى البريطانى http://www.britishcouncil.org/egypt.htm

بعد ماقفلت معاها ودخلت الموقع كنت قلقااااان جدا والله

كنت خايف جدا انى ماعدّيش ... والمشكلة انى لما دخلت ع النتيجة

لقيتها عبارة عن جدول طويل مكتوب فيه رقم كل واحد وقدّامه

إما PASS أو FAIL

او اربعة فى القايمة لقيتهم FAIL اتخضيت .. وفضلت نازل نازل

وفوجئت ان FAIL كتير .. اكتر مما كنت اتوقع

لغاية مارقمى قرّب ... والتلاتة اللى قبلى FAIL

لغاية مالقيت نفسى PASS والحمد لله شكرت ربنا وكنت فرحااان جدا

وبعدين عملت احصاء .... لقيت ان الناجحين 221 والراسبين 143

يعنى تقريبا نسبة النجاح فى الناس اللى دخلت الامتحان 61 %

الصراحة انى فوجئت ... لانى كنت متوقع اكتر من كده

المفروض ان الزمالة دى اسهل من الباطنة والاطفال

وكمان الجزء الاول اسهل من الجزئين التانيين

كنت متوقع نسبة النجاح اكتر من 85 %

وكمان اتضح لى انهم مش كاتبين اى درجات او نسبة فقط نجاح

او رسوب.....

الخلاصة : الحمد لله انى نجحت .... وان شاء الله اعدى باقى الزمالة

وبما انى نجحت .... اقدر اقول ان الكتب اللى ذاكرت منها دى كفاية

وانصح اللى داخل ان شاء الله انه يراجع كويس يعنى يكون بادىء بدرى

لانى زنقت نفسى فى المراجعة وده من اسباب قلقى انى مانجحش

مع تمنياتى بالتوفيق للجميع .... اخوكم : احمد ماهر

طريقة التقديم :

أولا هتحتاج من الكلية شهادة البكالوريوس " بالإنجليزى "
ولو لسه فى الامتياز يبقى هتجيب بيان نجاح بالإنجليزى
وفى الكلية رخّـموا شوية عليا عشان بيان النجاح اللى بالانجليزى
ده وقالولى زمايلك بياخدوه عربى ووووو .. خلى بالك ممكن الموظف
او الموظفة يكون مش فاهم ويضللك
المهم انا أصريت .. وبعدين هما اتصرفوا وعملوا لى بيان نجاح
بالانجليزى وده صيغته عشان لو احتجت تمليه للموظف فى الشؤون :
This is to certify that "your name " has obtained the M.B.B.Ch
Session:November 2006 "ده تاريخ امتحان البكالوريوس "
Cumulative Grade : Good "ده التقدير التراكمى "
Percentage :% "مجموعك بالنسبة المئوية "
This certificate is issued to the applicant upon his request
to be presented to The British Council.
He is now spending the required internship duration as of
01/03/2007 to 28/02/2008
"ده تاريخ الامتياز بتاعك من وإلى "
His examination result is still being approved by the
University Council.

طبعا الكلام اللى بين الاقواس ده تعليقى ومش من الورقة
والورقة بيكون عليها صورتك ملصقة وعليها ختم الكلية
وبتاخد امضاء رئيس شؤون الخريجين ووكيل الكلية



الخطوة التانية : مطلوب منك تجيب استمارة التقديم من المركز الثقافى
البريطانى طبعا مجانى او من موقع الكلية الملكية من هـــــنــــا
واستمارة التقديم للجزء الاول والتانى استمارة واحدة حتى انك ممكن
تقدم تمتحن الاتنين مع بعض بنفس الاستمارة بس بتدفع الفلوس على كل
جزء . يعنى تقريبا 4680 جنيه مصرى

طبعا هتطبع الاستمارة وانت محتاج منها فقط اول 4 ورقات
انما الورقة الخامسة والسادسة مش هتحتاجهم لانك هتمتحن عن
طريق المركز الثقافى البريطانى بالقاهرة وليس مباشرة عن طريق
الكلية الملكية..

البيانات :
طبعا هتكتب بياناتك كلها بحروف انجليزى كلها Capital
الورقة الاولى :
اول خانة سيبك منها لانك مالكش اى يوسرنيم مع الكلية
لان دى اول مرة بتقدم للكلية
تانى مستطيل للبييانات هتكتب فيه اسمك وعنوانك ووو
وماتنساش تكتب الايميل عشان هيبعتوا لك عليه
من الكلية الملكية ايميل يقولوا لك ان ملفك وصلهم
وبعدين ايميل تانى انهم قبلوك وهيكتبوا لك ايميل تبعت لهم
عليه اى استفسارات عايز تسألها

تالت مستطيل تختار انت عايز تمتحن الجزء الاول ولاّ التانى
ولاّ الاتنين معا .. بعدها اختار الكلية الملكية اللى انت
عايزها من اربع كليات .. انا اخترت انجلترا
ومركز الامتحان هوه British council

المستطيل الاخير فى الورقة الاول وهو اهم واحد :
ده تاخد فيه امضاء من " مدير شؤون الاطباء "
بالمستشفى اللى انت فيها..
هيكتب اسمه ويمضى .. ودرجته الوظيفيه
طبعا بالانجليزى .. افتكر انه كتب لى
Director of internship وحاجة كمان مش فاكرها
المهم هوه تقريبا متعود بيكتب ايه وبيبقى فاهم غالبا

وبعد مايمضى .. هتاخد الاستمارة وتروح تختمها ختم المستشفى
وبالنسبة لمستشفى جامعة المنصورة .. الختم هو ختم النسر
وهتلاقيه فى مبنى سكن الاطباء
وكمان هيكون معاك صورتين تكتب على ضهرهم اسمك بالكامل
انجليزى وكابيتال .. وتختم الصور بختم المستشفى فوق الاسم

بعد كده باقى البينات سهلة ولو حاجة وقفت معاك سيبها
فاضية وبعدين ابقى اسال هناك فى المركز الثقافى البريطانى
وانت بتقدم وهيقول لك تكتب ايه
يعنى هتلاقى بيانات شهادتك واللى هى M.B.B.Ch
ومن جامعة ايه وبتاريخ ايه وبلدك ولغتك اللى هى عربى
وخانة ال GMC or IMC registration number
تسيبها فاضية لان المفروض ان مش معانا الرقم ده
------------
كده انت بتسافر تقدم الاستمارة وبيان النجاح والصورتين
المختومين ... وتدفع الفلوس بالجنيه المصرى فى المركز الثقافى
البريطانى .. بيان النجاح هياخده يصوره منك ويرجع لك الاصل
وياخد منك الصورتين والاستمارة وتروّح بيتك
-----------
بعد ماتقدم وتتقبل ان شاء الله .. المركز هيبعت لك على عنوانك
قبل ميعاد الامتاحن تقريبا ب 10 أيام
جواب فيه ال Admission Paper اللى انت لازم تدخل بيه الامتحان
ولو الجواب ماوصلكش .. تروح تاخد نسخة بديلة من المركز الثقافى
البريطانى ... الورقة دى مكتوب فيها ال Candidate number
تقدر تقول عليه رقم الجلوس .. وكمان مكتوب لك عنوان المكان اللى
هتمتحن فيه وهو الاكاديمية العسكرية .. وانا امتحنت فيها
وسهل تروح لها .. ركبت لها المترو من رمسيس ونزلت محطة كوبرى القبة
و مشيت بس مشيت كتير لانى كنت نازل اسال وفاكره قريب
او ممكن تاخد تاكسى من بعد المترو
الجواب وصلنى السبت والامتحان كان يوم الاتنين
طبعا اتاخر وانا كنت خلاص فقدت الامل وكنت ناوى اسافر لهم الاحد
قبل الامتحان اخد منهم نسخة بديلة للورقة
ولما اتصلت بيهم عرفت انهم بعتوه من الاحد يعنى تقريبا اخد اسبوع
عشان يوصلنى ..
كمان هتحتاج صورة معاك وانت رايح الامتحان وكده تبقى دى رابع صورة
هتحتاجها .. الاولى كانت لبيان النجاح وكمان اتنين للاستمارة
------------
طبعا المراقبين فى الامتحان هيكلموك انجليزى كتير
مع انهم مصريين بس عشان تعيش الدور
وكمان فيه رقابة جامدة اوى ونظام جااامد ولازم تروح
قبل الميعاد تقعد تراجع فى قاعة مكيفة نضيفة
عشان لو وصلت متاخر لهم الحق انهم يمنعوك من الدخول
ويروح عليك الامتحان ..
كمان ابقى قابلنى لو عرفت تبص حواليك او تسال حد
مش عشان الرقابة .. بس الوقت ضيـــق اوى ويادوب
تلحق تجرى فى الحل ..